رسول اللہ ﷺ نے جس طرح نماز کے اعمال کو جاری کیا، ان کی کیفیت سے معلوم ہوتا ہے۔ آپ نے نماز کے قیام، رکوع سجدے، قعدے اس کی رکعات میں کسی تنوع یا اختیار کی کوئی گنجایش نہیں دی۔ اس لیے پوری امت یہی سمجھتی ہے کہ نماز کے ان اعمال میں کوئی دوسرا طریقہ یا کمی بیشی کرنا جائز نہیں۔ اس کے سورہ فاتحہ اور اس کے ساتھ قرآن ملانے کے لے علاوہ دیگر اذکار، رفع یدین اور نوافل وغیرہ میں آپ نے امت کو تنوع دکھایا، اور مختلف اذکار اختیار کرنے کی گنجایش دی۔ بلکہ لوگوں کے اپنے اختیار کردہ اذکار تک کو سن کر پسند کیا۔ اس طرح معلوم ہو جاتا ہے کہ کون سے اعمال لازمی ہیں اور کون سے اختیاری۔

نماز میں فاتحہ کا پڑھنا لازم ہے یہ امت میں طے تھا۔ پھر کسی ذہن میں یہ سوال آیا کہ جب امام فاتحہ پڑھ رہا ہو تو مقتدی کے لیے فاتحہ پڑھنا ضروی ہے یا نہیں۔ کیا امام کی قراءت مقتدی کے لیے بھی کفایت کرتی ہے یا نہیں۔

یہ ایک اطلاقی اور اجتہادی معاملہ ہوگیا۔ اس پر اختلاف ہوا۔ مگر اس پر کوئی اختلاف نہیں، فاتحہ بہرحال پڑھی جائے گی چاہے امام کی کافی سمجھ لی جائے یا انفرادی پڑھنا بھی لازم سمجھی جائے۔