مسلمان ہونا اور ایمان والا ہونا میں کچھ فرق ہے۔ ایمان خدا اور آخرت پر یقین کا نام ہے۔ یہ ایمان غیر مسلم میں بھی پایا جاتا ہے۔ چنانچہ اگر کوئی غیر مسلم ایمان والا ہے اور اس نے خدا کی طرف سے ملنے والی کسی سچائی کا کفر نہیں کیا اور نیک عمل کیے ہیں تو وہ جنت کا مستحق ہے۔ یعنی اس کے سامنے قرآن اور محمد رسول اللہ کی سچائی آ گئی تو خدا پر ایمان کا تقاضا ہے کہ اسے تسلیم کرے۔ بلا عذر انکار کفر ہے اور کافر جنت میں نہیں جائے گا۔ اگر یہ سچائی اس کے سامنے نہیں آئی تو محض اپنے ایمان اور نیک عمل کی وجہ سے ایک غیر مسلم بھی جنت میں جائے گا۔

اسی اصول پر اگر ایک مسلمان نے کسی حق کو جھٹلا دیا تو وہ بھی جنت میں نہیں جائے گا۔ چنانچہ اللہ نے فرمایا ہے کہ جس نے جان بوجھ کر قتل کیا یا خدا کی حدود سے تجاوز کیا وہ بھی ابدی جھنم کا مستحق ہے چاہے مسلمان ہو۔

مسلم ہوں یا غیر مسلم، دونوں کے لیے ایک ہی اصول ہے کہ وہ میسر علم کے مطابق سچا ایمان لائیں اور نیک عمل کریں۔

قرآن میں ایسی کوئی بات نہیں کہ لوگ کہیں گے کہ وہ توحید سے واقف نہ تھے۔ اس کے برعکس سورہ اعراف کی آیت 172 میں یہ کہا گیا ہے کہ لوگ یہ عذر نہیں کر سکیں گے کہ وہ توحید سے واقف نہیں۔ یہ ان کی فطرت میں موجود ہے۔

سورہ بقرہ کی آیت 62 میں اللہ تعالی نے اس وقت کے گروہوں کا نام لے کر بتایا ہے کہ یہ سب جنت کے مستحق ہیں اگر خدا اور یوم آخرت پر ایمان اور نیک عمل کریں گے۔

إِنَّ الَّذِينَ آمَنُوا وَالَّذِينَ هَادُوا وَالنَّصَارَىٰ وَالصَّابِئِينَ مَنْ آمَنَ بِاللَّهِ وَالْيَوْمِ الْآخِرِ وَعَمِلَ صَالِحًا فَلَهُمْ أَجْرُهُمْ عِندَ رَبِّهِمْ وَلَا خَوْفٌ عَلَيْهِمْ وَلَا هُمْ يَحْزَنُونَ

یہود بھی اسی زعم میں مبتلا تھے کہ صرف یہود ہی جنت میں جائیں گے۔ سورہ بقرہ اور آل عمران ان کی اس غلط فہمی کو دور کرتی ہیں۔ یہی غلط فہمی مسلمانوں کو لاحق ہو گئی ہے۔

آپ کے سوال ہی میں آپ کا جواب موجود ہے۔ اور یہی چیز میرے پہلے جواب میں موجود ہے۔ خدا پر ایمان لانے کا مطلب یہی ہے کہ اس کی طرف سے جو حکم ملے اس کو تسلیم کیا جائے۔ جب کسی کو معلوم ہو کہ خدا کا کوئی نبی آیا ہے یا آیا تھا اور اس تک یہ خبر مستند اور اطمینان بخش طریقے سے پہنچ جائے تو ایمان کا تقاضا ہے کہ اسے تسلیم کرے۔ انکار کرے گا تو کفر ہو جائے گا اور وہ جنت میں جانے کا مستحق نہیں رہے گا۔ خبر نہیں ملی تو کفر بھی نہیں ہوگا۔

یہی آیت جو پیش کی گئی۔ اس پر غور کیجیے۔

نیز ایک صحیح روایت میں بھی اس کو واضح کیا گیا ہے۔

روایت میں چار طرح کے افراد کا ذکر ہے جو اللہ کے سامنے اپنا عذر پیش کریں گے اور وہ قبول کیا جائے گا:

1۔ بہرا جو سن نہیں سکتا (اسی پر دیگر معذوروں کو بھی قیاس کیا جا سکتا ہے جن کے ظاہری حواس کا نقص بلوغ دعوت میں مانع ہو)۔

2۔ کم عقل لوگ جنھیں چیزوں کی کوئی سمجھ نہ ہو۔ ایسے لوگ کہیں گے کہ ہمیں تو سمجھ ہی نہیں تھی اور بچے ہماری بے عقلی کی وجہ سے مینگنیاں اٹھا اٹھا کر ہم پر پھینکتے تھے۔

3۔ انتہائی ضعیف العمر لوگ جن کو ایسی حالت میں دعوت پہنچی ہو کہ وہ قوت فیصلہ کھو چکے ہوں۔

4۔ ایسے لوگ جو دور فترت میں ہوں، یعنی جب انبیاء کی دعوت مرور زمانہ سے مٹ چکی ہو اور کسی قابل اعتماد اور واضح صورت میں موجود نہ ہو۔

(علماء یہی حکم ان لوگوں کا بیان کرتے ہیں جن تک اسلام کی دعوت نہ پہنچی ہو۔ امام غزالی رح فرماتے ہیں کہ جن تک اسلام یا پیغمبر اسلام کا تعارف ایسی صورت میں پہنچا ہو کہ بجائے متوجہ کرنے کے انھیں متنفر کرنے کا باعث بنے، وہ بھی اسی اصول کے تحت آتے ہیں۔)

ایسے لوگوں کے ایمان کی آزمائش کی ایک شکل روایت میں یہ بیان ہوئی ہے کہ ان سے کہا جائے گا کہ اس آگ میں داخل ہو جاؤ۔ جو اطاعت کرتے ہوئے اس میں داخل ہوں گے، ان پر آگ ٹھنڈک اور سلامتی بن جائے گی، اور جو انکار کر دیں گے، ان کو آزمائش میں ناکامی پر آگ میں ڈال دیا جائے گا۔